- Yield: 1 օր անց
- Prep Time: 40 minutes
- Cook Time: 25-35 minutes
Տորթ Զահեր
1832 թ. Ավստրիայի ԱԳ նախարար Մեթերնիհը, հրամայում է իր խոհարարին յուրօրինակ տորթ պատրաստել` իր բարձրակարգ հյուրերի համար։ Այդ օրը շեֆ-խոհարարը հիվանդ է լինում, և այդ ծանր պարտականությունն ընկնում է 16-ամյա Ֆրանց Զահերի վրա, ով այդ ընթացքում պալատական խոհանոցում հրուշակեղենային վարպետության դասեր էր առնում։ Հյուրերը տորթը հավանում են, բայց տարիների ընթացքում այն մոռացության է մատնվում։
Տարիներ անց, տղան` էդուարդ Զահերը, բաղադրատոմսը մի քանի անգամ փոփոխում է, որից հետո տորթը լայն տարածում է ստանում:
Բաղադրիչներ
- Խմորի համար՝
- ձու - 6 հատ
- շաքարավազ - 180 գր
- շոկոլադ սև - 150 գր
- ալյուր - 150 գր
- կարագ - 120 գր
- վանիլին - 1 թ/գդ
- Բիսկվիթը ներծծելու համար՝
- ջեմ ծիրանի - 200 գր
- Ջնարակի համար՝
- շոկոլադ սև - 150 գր
- սերուցք 30-35% յուղայնությամբ - 100 մլ
- կարագ - 50 գր
Քայլերի հաջորդականություն
- Շոկոլադը կտրատում ենք և գոլորշու վրա կամ միկրոալիքային վառարանում հալեցնում ենք(միկրոալիքային վառարանում ավելի հեշտ է)։ Մի քիչ սառեցնում ենք։
- Փափկեցրած կարագը շաքարավազի կեսի հետ հարում ենք և ավելացնում ենք վանիլինը։
- Ավելացնում ենք դեղնուցները և և կրկին հարում ենք։
- Ավելացնում ենք շոկոլադն ու հարում։
- Սպիտակուցները հանգամանորեն հարում ենք աստիճանաբար ավելացնելով շաքարավազի երկրորդ կեսը` մինչև պինդ փրփուր ստանանք։ Հիշեցնում ենք, որ սպիտակուցները պետք է հարել մաքուր և չոր խառնիչներով` մաքուր և չոր ամանում։
- Շոկոլադե զանգվածի մեջ ենք լցնում հարած սպիտակուցները, ամեն անգամ թիակով վերից վար շարժումներով զգուշորեն խառնելով։
- Այնուհետև մաս առ մաս մաղած ալյուր ենք ավելացնում, զգուշորեն վերից վար խառնելով. աշխատում ենք զանգվածը օդեղեն մնա։
- Ձևամանը պատում ենք յուղաթղթով, կողքերը թեթևակի յուղով պատում ենք (ցանկալի է 22 սմ տրամագծով ձևաման վերցնել)։ Խմորը զգուշորեն տեղափոխում ենք ձևամանի մեջ և թիակով հավասարեցնում ենք։
- Տեղափոխում ենք նախապես մինչև 180 աստիճան տաքացրած ջեռոցի մեջ և թխում ենք մոտ 25-35 րոպե։ Թխելու ժամանակահատվածը կախված է ջեռոցից, այնպես, որ պետք է ուշադիր լինել, որ բիսկվիթը չչորանա։ Փայտիկով փորձում ենք, եթե այն չոր է դուրս գալիս բիսկվիթի միջից, ուրեմն պատրաստ է։
Պատրաստի բիսկվիթն ամբողջությամբ սառեցնում ենք։
- Ծիրանաջեմը (կամ ծիրանի մուրաբան) բլենդերով հարում ենք, մինչև համասեռ դառնա։
- Բիսկվիթը 2 շերտի ենք կիսում, անհրաժեշտության դեպքում վերին շերտը հավասարեցնում ենք։
Ներքևի շերտը դնում ենք ափսեի վրա (այնպես, ինչպես թխվել է) և ջեմի կեսը հավասարապես տարածում ենք վրան։
- Վրան ենք դնում երկրորդ շերտը և ջեմի մյուս կեսով պատում ենք տորթի վերևամասն ու կողքերը։ Տեղափոխում ենք սառնարանը` մինչև ջնարակը պատրաստ կլինի։
- Պատրաստում ենք ջնարակը։
Շոկոլադը կտրատում ենք և դնում ամանի մեջ։
- Սերուցքն ու կարագը լավ տաքացնում ենք (պետք է կարագը հալվի, բայց զանգվածը չպետք է եռման աստիճանի հասնի)։
Շոկոլադի վրա ենք լցնում տաք սերուցքը և ակտիվորեն խառնում ենք։ Սկզբում կարող է թվալ, թե զանգվածը անհամասեռ է, բայց շարունակում ենք ակտիվորեն խառնել, մինչև համասեռ, փայլուն և թանձր զանգված ստանանք։
Եթե ջնարակը շատ ջրիկ է, որոշ ժամանակով դնում ենք սառնարանը, որպեսզի թանձրանա։
- Տորթն ամբողջությամբ ջնարակապատում ենք։
- Ըստ ցանկության կարող ենք վրան գրություն թողնել։
Տորթը 8-24 ժամով տեղափոխում ենք սառնարանը, որպեսզի ներծծվի։
- Պատրաստ է մատուցման։
Ի դեպ, այս տորթն իր անունը ստացել է ի պատիվ ավստրիացի հրուշակագործ Ֆրանց Զահերի, ով բաղադրատոմսի հեղինակն է: Այս տորթը, սովորաբար, մատուցում են հարած սերուցքի կամ պլոմբիրի հետ 🙂
Ձեզ կարող է հետաքրքրել նաև
Թողնել պատասխան
Մուտք եղեք: