Չափաբաժինները` 14 հատ

1. Պատրաստում ենք խմորը։ Ամանի մեջ ենք լցնում ալյուրը և աղը։ Ավելացնում ենք խոշոր քերիչով անցկացրած սառեցված կարագը։ Լավ խառնում ենք, որպեսզի կարագի կտորներն իրար չկպչեն։
   
2. Լավ խառնում ենք, ավելացնում ենք սառը ջուրը։ Ձեռքերով խմորը գնդում ենք (երկար չենք հունցում)։ 30 րոպեով (կամ ավելի երկար) տեղափոխում ենք սառնարանը։
   
3. Պատրաստում ենք միջուկը։ Սոխը մաքրում ենք և մանր կտրատում։
   
4. Բուդը ոսկրահան ենք անում և միսը մանր կտրատում ենք (ճարպային հատվածը չենք հանում, որպեսզի միսն ավելի հյութեղ ստացվի)։ 700 գր բուդից մոտ 500 գր հավի միս է ստացվում։
   
5. Ամանի մեջ ենք լցնում սոխը, հավի միսը ,աղը և պղպեղը։ Խառնում ենք։
   
6. Սկսում ենք սամսան ծեփել։ Խմորը կիսում ենք և մի մասը տեղափոխում ենք սառնարանը։ Մյուս մասից հաստ երշիկ ենք ձևավորում և 7 մասի ենք բաժանում այն։
   
7. Խմորի յուրաքանչյուր մասը ձեռքերով տրորում ենք։ Այնուհետև 12 սմ տրամագծով շրջանաձև գրտնակում ենք(անհրաժեշտության դեպքում ալյուր ենք ավելացնում)։
   
8. Խմորի մեջտեղի հատվածում 1 լիքը ճ/գդ միջուկ ենք լցնում։
   
9. Խմորի երկու եզրերը բարձրացնում ենք և միացնում իրար։
   
10. Բարձրացնում ենք երրորդ եզրը և կպցնում ենք իրար։
    
11. Անկյունները նույնպես լավ սեղմում ենք։
    
12. Շրջում ենք, ստացվում է սուրանկյուն եռանկյունի։ Նույն եղանակով պատրաստում ենք նաև մնացածը։
    
13. Պատրաստի եռանկյունիները տեղափոխում ենք յուղաթղթապատ տապակի մեջ։ Դեղնուցի վրա 1 գդալ ջուր ենք ավելացնում, խառնում ենք և քսում եռանկյունիների վրա։
    
14. Ցանկության դեպքում վրայից քունջութ ենք ցանում։ Տեղափոխում ենք մինչև 180 աստիճան տաքացրած ջեռոցի մեջ։ Թխում ենք 40-50 րոպե` մինչև թեթևակի ոսկեգույն երանգ ստանանք։
    
15. Սամսան կտրած վիճակում։
    
16. Սամսան շատ համեղ է տաք վիճակում։